రావణం మూవీని నిర్మించబోతున్నట్లు దిల్ రాజు ప్రకటించారు. ఈ సినిమాకి పాన్ ఇండియా డైరెక్టర్ ప్రశాంత్ నీల్ దర్శకత్వం వహిస్తాడని స్పష్టం చేసిన దిల్ రాజు.. బెస్ట్ వీఎఫ్‌క్స్‌ని ఈ మూవీలో చూపించబోతున్నట్లు హామీ ఇచ్చారు. అయితే.. ఈ రావణం సినిమాలో హీరో, హీరోయిన్‌గా ఎవరు నటించబోతున్నారు? అనే విషయాన్ని మాత్రం దిల్ రాజు గోప్యంగా ఉంచారు. త్వరలోనే టెక్నీషన్స్ వివరాల్ని ప్రకటిస్తామని మాత్రమే వెల్లడించారు.
టాలీవుడ్‌లోని టాప్ ప్రొడ్యూసర్లలో దిల్ రాజు కూడా ఒకరు. తమిళ్ హీరో విజయ్‌తో దిల్ రాజు నిర్మించిన వారీసు మూవీ వారసుడు పేరుతో ఈ నెల 14నసంక్రాంతికి రిలీజైంది. ఫ్యామిలీ ఎంటర్‌టైనర్‌గా థియేటర్లలోకి వచ్చిన ఈ సినిమా పాజిటివ్ టాక్‌తో థియేటర్లలో నడుస్తోందని చిత్ర యూనిట్ చెప్పుకొస్తోంది. ఇదే ఊపులో దిల్ రాజు తన నెక్ట్స్ మూవీని కూడా ప్రకటించేశారు. ఈ సినిమాకి పాన్ ఇండియా డైరెక్టర్ ప్రశాంత్ నీల్ దర్శకత్వం వహించబోతున్నాడు.
వారీసు సినిమా ప్రమోషన్స్‌లో భాగంగా దిల్ రాజు మాట్లాడుతూ.. తన నెక్ట్స్ సినిమా పేరు రావణం అని వెల్లడించారు. అయితే.. ఈ మూవీలో నటించే హీరో,హీరోయిన్స్ పేర్లని మాత్రం వెల్లడించని దిల్ రాజు.. బెస్ట్ వీఎఫ్‌ఎక్స్‌తో మూవీని తెరకెక్కించబోతున్నట్లు మాత్రం స్పష్టం చేశారు. దిల్ రాజు ప్రొడక్షన్ హౌస్ నుంచి ఏటా సినిమాలు వస్తూనే ఉంటాయి. ఇందులో ఫ్యామిలీ సినిమాలే ఎక్కువ.మెగా పవర్ స్టార్ రామ్ చరణ్‌తో కలిసి ప్రస్తుతం దిల్ రాజు ఒక సినిమాని నిర్మిస్తున్నారు. ఈ సినిమాకి శంకర్ దర్శకత్వం వహిస్తుండగా.. పొలిటికల్ థ్రిల్లర్‌గా ఈ ఏడాది థియేటర్లలోకి రానుంది. ఈ మూవీకి ఇంకా టైటిల్ పెట్టలేదు. కానీ.. RC15 అనే వర్కింగ్ టైటిల్‌తో షూటింగ్‌ని చేస్తున్నారు. ఇప్పటికే షూటింగ్ కూడా తుది దశకి చేరుకున్నట్లు సమాచారం.
ప్రశాంత్ నీల్ చేతిలో ప్రస్తుతం రెండు పెద్ద ప్రాజెక్ట్‌లు ఉన్నాయి. యశ్ హీరోగా కేజీఎఫ్ 1, 2 సినిమాలు చేసిన ప్రశాంత్ నీల్.. ప్రస్తుతం యంగ్ రెబల్ స్టార్ ప్రభాస్‌తో ‘సలార్’ మూవీని తెరకెక్కించే పనిలో బిజీగా ఉన్నాడు. ఆ తర్వాత జూనియర్ ఎన్టీఆర్‌తో ఒక సినిమాని ప్రశాంత్ నీల్ చేయాల్సింది. దాంతో ఈ రెండు ప్రాజెక్ట్‌లు ముగిసిన తర్వాతే దిల్ రాజు రావణం సెట్స్‌పైకి వెళ్లే అవకాశం ఉంది. అయితే.. మధ్యలో కేజీఎఫ్-3 కూడా ఎంట్రీ ఇచ్చే అవకాశం ఉంది. ఈ దిశగా హోంబలే ఫిల్మ్స్ కూడా ప్రయత్నాలు చేస్తున్నట్లు టాక్ వినిపిస్తోంది.
