ఇన్నాళ్లూ మాటల యుధ్దంలో పోటీ పడుతున్న అగ్రరాజ్యాల మధ్య కొత్తగా మరో యుధ్దం మొదలైంది. కొత్తగా మొదలైన ఈ యుధ్దంలో పాల్గొంటున్న దేశాలు మరేవో కావు..అగ్రరాజ్యం అమెరికా, డ్రాగన్ కంట్రీ చైనా..మనం చాలా రకాల యుధ్దాలను చూసాం..ఈ శతాబ్దంలో ప్రపంచయుధ్దాలను ప్రత్యక్షంగానో పరోక్షంగానో చూసాం..సరిహద్దుల్లో జరిగిన భీకరమైన దాడులను శిధిలాలుగా మారిన నగరాలను చూసాం.. అయితే ఇప్పుడు జరగబోయే యుద్ధం దేశ సరిహద్దుల్లో మాత్రమే జరగదు. ఈ కొత్త యుద్ధం ప్రస్తుతం ఆర్థిక రంగంలో ప్రారంభమైంది. అత్యున్నత సాంకేతిక పరిజ్ఞానం ద్వారా మార్కెట్ శక్తులను తమ ఆధీనంలోకి తెచ్చుకునేందుకు నైపుణ్యం అనే ఆయుధాన్ని ఉపయోగించి ఈ యుద్ధం జరుగుతోంది.
మనం గుర్తించం కానీ.. చాలా దేశాలు ఈ యుద్ధంలో పాలుపంచుకున్నాయి. అయితే అమెరికా-చైనాలు సాంకేతిక యుద్ధంలో ముఖాముఖిగా నిలిచాయి. యుద్దం కూడా మరేదానికోసమో కాదు.. ఈ యుద్ధం సెమీకండక్టర్ల గురించి అంటే ఆశ్చర్యం వేయకుండా ఉండదు. సెమికండక్టర్ అనగానే మనకు గోరంత ఉండే చిప్ గుర్తుకు వస్తుంది. ప్రస్తుతం ఈ చిప్ మన దైనందిన జీవితంలో భాగంగా మారింది. ఈ చిన్న సిలికాన్ ముక్క 500 బిలియన్ల డాలర్ల పరిశ్రమకు కేంద్రంగా మారింది. దీని విలువ 2030 నాటికి రెట్టింపు అవుతుందని అంచనాలున్నాయి.
చిప్ లేనిదే ఏ పరికరమూ నడిచే అవకాశం ఉండదు. మొబైల్ దగ్గర్నుంచి సూపర్ కంప్యూటర్ దాకా, చిన్న మోపెడ్ వాహనం దగ్గర్నుంచి అతి పెద్ద లారీ దాకా ఇప్పుడు చిప్ లేనిదే నడిచే స్థితి లేదు. అంతా ఎలక్ట్రానిక్ మయంగా మారింది. ప్రపంచం మొత్తంగా చిప్ లకు డిమాండ్ ఉంది. అయితే దాని సప్లై చైన్ ను..అంటే.. సరఫరా గొలుసును ఎవరు నియంత్రిస్తారనే విషయంపై యుద్ధం జరుగుతోంది. కంపెనీలు.. వాటిని తయారు చేసే దేశాల నెట్‌వర్క్అందుకోగలిగితే ప్రపంచాన్ని శాసించే సూపర్ పవర్‌ను పొందుతాయి.
ఈ చిప్ల తయారీకి సాంకేతికతను చైనా కోరుకుంటోంది. కానీ ఈ సాంకేతికతకు కావాల్సిన చాలా మూలాలను అమెరికా కలిగి ఉంది. అందుకే ఆ దేశం, చైనాను వెనక్కి నెట్టివేస్తోంది. ముందే ఈ రెండు దేశాలకు ఒకటంటే మరొకదానికి పడదు..సెమీకండక్టర్లను తయారు చేయడం అన్నది చాలా సంక్లిష్టమైన ప్రక్రియ. దీనికి అత్యంత నైపుణ్యత అవసరం. ప్రపంచంలోకెల్లా పాపులర్ బ్రాండ్ అయిన ఐఫోన్ మొబైల్ చిప్లు అమెరికాలో రూపొందించబడ్డాయి. తైవాన్, జపాన్ లేదా దక్షిణ కొరియాలో తయారు చేయబడుతున్నాయి. ఆపై అవి చైనాలోని యాపిల్ అనుబంధ కంపెనీల ద్వారా అసెంబుల్ చేయబడతున్నాయి. అయితే గత సంవత్సరం చైనాలో చెలరేగిన కరోనా కారణంగా యాపిల్ కంపెనీ తన యునిట్ ను ప్రస్తుతం భారతదేశంలో ఏర్పాటు చేసుకుంది.
ఇప్పటికే ఈ పరిశ్రమలో చాలా పెట్టుబడులు పెట్టింది. పైగా భారతదేశంలో యాపిల్ కంపెనీ భవిష్యత్తులో కీలక పాత్రను పోషించనుందని నిపుణులు చెబుతున్నారు. అయితే ఈ పరిస్తితిని ముందే అర్థం చేసుకున్న భారత్ తైవాన్ సెమికండక్టర్ కంపెనీలతో ఒప్పందం కుదుర్చకుంది. ఇది కాస్త చైనాకు తలనొప్పిగా మారింది. అయితే సెమీకండక్టర్స్ మొదట అమెరికాలో కనుగొనబడ్డాయి కానీ కాలక్రమేణా తూర్పు ఆసియా దాని తయారీ కేంద్రంగాఉద్భవించింది. అందుకు కారణం అక్కడి ప్రభుత్వాల ప్రోత్సాహకాలు, రాయితీలే.
ప్రచ్ఛన్న యుద్ధ కాలం నుండి రష్యాతో బలహీనమైన సంబంధాలను కలిగి ఉన్నందున ఈ ప్రాంతంలో వాణిజ్యాన్ని అభివృద్ధి చేయడానికి వాషింగ్టన్ వ్యూహాత్మక భాగస్వామ్యాలను కూడా ఏర్పరచుకుంది. ఆసియా-పసిఫిక్ ప్రాంతంలో చైనాకు పెరుగుతున్న పలుకుబడి నేపథ్యంలో అమెరికాకు ఇది చాలా ముఖ్యమైనది. ఇప్పుడు ఈ చిప్లను పెద్ద ఎత్తున ఉత్పత్తి చేయడంతో దేశాల మధ్య పోటీ నెలకొంది. స్వయంచాలకంగా ఆన్ మరియు ఆఫ్ చేయగల చిన్న సిలికాన్ పొరపై ఎన్ని ట్రాన్సిస్టర్‌లు సరిపోతాయి అనేది ఇప్పుడు సవాలు. అందుకే సెమీకండక్టర్ పరిశ్రమ దీనిని ‘మూర్స్ లా’ అని పిలుస్తుంది. కాలక్రమేణా ట్రాన్సిస్టర్ సాంద్రతను రెట్టింపు చేయడం చాలా కష్టమైన లక్ష్యంగా ఉంటుంది.
ఇది ఎలక్ట్రానిక్ పరికరాల పనితనాన్ని వేగవంతం చేస్తుంది. స్మార్ట్ హోమ్ పరికరాలను కాలక్రమేణా మరింత స్మార్ట్‌గా చేస్తుంది.. సోషల్ మీడియా కంటెంట్ విస్తరిస్తుంది. అగ్రశ్రేణి చిప్ తయారీదారులకు కూడా దీన్ని తయారు చేయడం అంత సులభం కాదు. ఈ చిప్ మానవ వెంట్రుకల అంచు కంటే చిన్నదిగా ఉంటుంది. ఇది సైజులో 50 నుండి 100,000 నానోమీటర్లు ఉంటుంది. ఈ చిన్న ‘స్పెషల్ ఎడ్జ్’ చిప్స్ అత్యంత శక్తివంతమైనవని నిపుణులు చెబుతున్నారు. వీటిలో ఇంటర్నెట్-కనెక్ట్ చేయబడిన సూపర్ కంప్యూటర్లు, AI వంటివి ఉంటాయి. ఈ చిప్ల మార్కెట్ కూడా చాలా లాభదాయకంగా ఉంది. ఎందుకంటే ఇది మన రోజువారీ జీవితాన్ని కూడా వేగవంతం చేస్తుంది.
వీటిని మైక్రోవేవ్‌లు, వాషింగ్ మెషీన్లు, రిఫ్రిజిరేటర్లలో ఉపయోగిస్తారు. అయితే భవిష్యత్తులో దీని డిమాండ్ తగ్గే అవకాశం ఉంది. ప్రపంచంలోని చాలా చిప్లు ప్రస్తుతం తైవాన్‌లో తయారు చేయబడ్డాయి. అందుకే దీనిని ‘సిలికాన్ షీల్డ్’ అని పిలుస్తారు. చైనా కూడా జాతీయ ప్రాధాన్యత ఆధారంగా చిప్లను ఉత్పత్తి చేస్తుంది.. వాటిని సూపర్ కంప్యూటర్లు.. AIలలో ఎక్కువగా ఉపయోగిస్తోంది. ఈ రంగంలో గ్లోబల్ లీడర్‌గా అవతరించే రేసులో ఇది ఎక్కడా లేదు. కానీ గత దశాబ్దంలో ఇది ఈ ప్రాంతంలో ముఖ్యంగా చిప్ డిజైన్ సామర్థ్యం పరంగా ఊపందుకుంది.
ఒక శక్తివంతమైన దేశం అధునాతన కంప్యూటింగ్ టెక్నాలజీని పొందినప్పుడల్లా, అది ఇంటెలిజెన్స్, సైనిక వ్యవస్థల్లో ఉపయోగిస్తుంది. తైవాన్, ఇతర ఆసియా దేశాలపై ఆధారపడటం వల్ల, అమెరికా ఇప్పుడు దాని నిర్మాణాన్ని వేగవంతం చేస్తోంది. చిప్ తయారీ సాంకేతికతలో చైనాను అడ్డుకునేందుకు బిడెన్ ప్రభుత్వం ప్రయత్నిస్తోంది. దీన్ని నియంత్రించేందుకు చిప్స్, చిప్ తయారీ పరికరాలు, US సాఫ్ట్‌వేర్‌లను చైనాకు విక్రయించకుండా కంపెనీలను నిషేధిస్తూ వాషింగ్టన్ గత అక్టోబర్‌లో కొన్ని నిబంధనలను ప్రకటించింది.
అమెరికా నిర్ణయం ప్రపంచంలోని అన్ని కంపెనీలకు వర్తిస్తుంది. ఈ నిర్ణయం యూఎస్ పౌరులు చైనాలోని శాశ్వత కర్మాగారాల్లో చిప్లను ఉత్పత్తి చేయకుండా లేదా అభివృద్ధి చేయకుండా నిషేధించింది. బయటి దేశాల నుంచి చైనాకు జరిగే చిప్ సప్లయ్‌‌‌‌‌‌‌‌‌‌‌‌‌‌‌‌‌‌‌‌ను నియంత్రించేందుకు అమెరికా తీసుకుంటున్న చర్యలను చైనీస్ ప్రభుత్వం ఖండించింది. ఇంటర్నేషనల్ ఎకనామిక్‌, ట్రేడ్ రూల్స్‌‌‌‌‌‌‌‌కు ఇది విరుద్ధమని వాదించింది. అడ్వాన్స్డ్‌ కంప్యూటింగ్ చిప్లను చైనా తయారు చేయకుండా ఉంచేందుకు యూఎస్ తన చిప్ టెక్నాలజీని చైనాకు ఎక్స్‌‌‌‌‌‌‌‌పోర్ట్ చేయడంలో ఇబ్బందులు పెడుతోంది. అడ్వాన్స్డ్‌, హై పెర్ఫార్మెన్స్‌ కంప్యూటింగ్ చిప్లు, సెమికండక్టర్ల మాన్యూఫాక్చరింగ్ ఎక్విప్‌‌‌‌‌‌‌‌మెంట్లను చైనాకు ఎగుమతి చేయడంలో యూఎస్ శుక్రవారం నియంత్రణలు పెట్టింది.
అంతేకాకుండా ఇప్పటికే సూపర్ కంప్యూటర్లు లేదా సెమికండక్టర్ డెవలప్‌‌‌‌‌‌‌‌మెంట్‌‌‌‌‌‌‌‌లో చైనా వాడుతున్న ఐటెమ్‌‌‌‌‌‌‌‌లకు కొత్తగా లైసెన్స్ తీసుకోవాలని ఆదేశాలిచ్చింది. దీనిపై చైనా మండిపడుతోంది. సైన్స్ అండ్ టెక్నాలజీని యూఎస్ ఆయుధంగా వాడుతోందని, వీటితో రాజకీయం చేస్తోందని మావ్‌ నింగ్ అన్నారు. ఎన్ని చేసినా చైనా అభివృద్ధి అడ్డుకోలేరని హెచ్చరించారు. యూఎస్ మాత్రం తమ ఫారిన్ పాలసీలో భాగంగా నేషనల్ సెక్యూరిటీని కాపాడుకోవడానికి తాజా చర్యలు తీసుకున్నామని చెప్పుకొస్తోంది.
టెక్నాలజీ పరమైన అంశాల్లో చైనా, యూఎస్ మధ్య సంబంధాలు గత కొన్నేళ్ల నుంచి క్షీణిస్తున్నాయి. సెమికండక్టర్ల డెవలప్‌‌‌‌‌‌‌‌మెంట్‌‌‌‌‌‌‌‌లో యూఎస్‌‌‌‌‌‌‌‌కు పోటీగా చైనా ఎదుగుతోంది. ఇప్పటికే రూ. వేల కోట్ల ఇన్వెస్ట్‌‌‌‌‌‌‌‌మెంట్లను చిప్ డెవలప్‌‌‌‌‌‌‌‌మెంట్‌ కోసం పొందగలిగింది. మరోవైపు సైన్స్ అండ్ టెక్నాలజీలో టాప్‌‌‌‌‌‌‌‌లో కొనసాగుతున్న యూఎస్ తాజా చైనా డెవలప్‌‌‌‌‌‌‌‌మెంట్‌‌‌‌‌‌‌‌ను చూసి ఆందోళన పడుతోందని చెప్పొచ్చు. యూఎస్, చైనా మధ్య నెలకొన్న గొడవలతో చైనాతో పాటు యూఎస్ కంపెనీల షేర్లు నష్టపోతున్నాయి. యూఎస్ చిప్ల కంపెనీ ఎన్‌‌‌‌‌‌‌‌విడియా, ఏఎండీ షేర్లు గత ఏడాది కాలంలో 40 శాతానికి పైగా పతనమయ్యాయి.
