బింబిసార సినిమాలో నెగెటివ్ షేడ్స్ ఉన్న పాత్ర పోషించిన ఈ హీరో… తన అప్ కమింగ్ మూవీ అమిగోస్ లో కూడా ఓ నెగెటివ్ రోల్ పోషించాడు. ఇటివల రిలీజైన టీజర్ తో ఈ విషయాన్ని బయటపెట్టారు మేకర్స్.
గతేడాది బింబిసార వంటి సాలిడ్ హిట్‌తో ప్రేక్షకుల ముందుకొచ్చాడు కళ్యాణ్ రామ్. మల్లిడి వశిష్ట్‌ను దర్శకుడిగా పరిచయం చేస్తూ తనే నిర్మాతగా ఒక ప్రయోగాత్మక చిత్రంలో హిట్ కొట్టాడు. అంతేకాదు ఒక కొత్త దర్శకుడిని నమ్మి బింబిసార చిత్రంపై 35 కోట్లకు పైగా బడ్జెట్ ఇన్వెస్ట్ చేయడం సాహసమనే చెప్పాలి. అయినా తన డెసిషన్ సరైందనేనని బింబిసార సక్సెస్‌తో నిరూపించాడు కళ్యాణ్ రామ్.
ఇలా ప్రయోగాలంటే పడిచచ్చే నందమూరి హీరో ఇప్పుడు అమిగోస్ చిత్రంలో నటిస్తున్నాడు. ఇటివల టీజర్ విడుదల చేయగా.. బయోలాజికల్ కనెక్షన్ లేకుండా ఒకే రూపంలో ఉన్న ముగ్గురు వ్యక్తులుగా కనిపించి ఆకట్టుకున్నాడు.
రాజేంద్ర రెడ్డి దర్శకత్వంలో తెరకెక్కిన ఈ చిత్రంలో కళ్యాణ్ రామ్ మూడు పాత్రల్లో కనిపించగా.. ఆశిఖ రంగానాథన్ ఫిమేల్ లీడ్‌గా నటించింది. టీజర్ విషయానికొస్తే, కోల్‌కతాకు చెందిన మైఖేల్‌గా కళ్యాణ్ రామ్.. అచ్చం తన పోలికలతో ఉన్నటువంటి మరో వ్యక్తితో ఫోన్‌లో పరిచయం చేసుకుంటాడు.
తాను అతని డోపెల్‌గ్యాంగర్ ను అని చెప్తాడు. ఇలా ఒకే రూపం కలిగిన మరొకరితో కలిసి మొత్తం ముగ్గురు వ్యక్తులు కలవడం వెనక ఏదో సీక్రెట్ ఆపరేషన్ ఉన్నట్లు అర్థమవుతుంది. ఈ క్రమంలోనే మనం కలవడం అద్భుతం.. విడిపోవడం అవసరం అని మైఖేల్ చెప్పే డైలాగ్ ప్రేక్షకుల్లో క్యూరియాసిటీ కలిగిస్తోంది.
అయితే మైఖేల్‌కు తన డోపెల్‌గ్యాంగర్స్ గురించి ఎలా తెలుసు? అసలు మైఖేల్ వాళ్లద్దరినీ వాడుకుని ఏం చేశాడు? అనేది సినిమా చూస్తేనే తెలుస్తుంది. కాగా.. కళ్యాణ్ రామ్ మూడు విభిన్న పాత్రల్లో అద్భుతంగా కనిపించాడు. అంతేకాదు యాక్షన్ సీన్లతో నిండిన టీజర్ థ్రిల్లర్ మూవీని తలపించింది.
మరోవైపు బ్యాక్‌గ్రౌండ్‌ స్కోర్‌ కూడా అదనపు ఆకర్షణగా నిలిచింది. టాలీవుడ్‌లో వరుస సినిమాలు నిర్మిస్తున్న మైత్రీ మూవీ మేకర్స్ సంస్థనే ఈ అమిగోస్ చిత్రాన్ని కూడా నిర్మించింది. ఈ చిత్రంలో బ్రహ్మాజీ, సప్తగిరి తదితర ప్రముఖ నటీనటులు కీలక పాత్రల్లో కనిపించారు. ఫిబ్రవరి 10న విడుదల కానున్న ఈ చిత్రానికి కోలీవుడ్ స్టార్ మ్యూజిక్ డైరెక్టర్ జిబ్రాన్ సంగీతం అందించారు.
