స్విట్జర్ లాండ్ అత్యాచార చట్టానికి సర్దుబాట్ల గురించి ఆసక్తికరమైన చర్చ జరుగుతోంది. ఈ చర్చను ప్రపంచదేశాలు తీక్షణంగా గమనిస్తున్నాయి. నిజానికి ప్రతీ దేశంలో రేప్ అక్రుత్యాలకు ఏ దేశానికి సంబంధించిన చట్టాలు ఆ దేశానికి ఉన్నాయి. కాని స్విట్జర్ లాండ్ లో మాత్రం దీని గురించి తీవ్రస్థాయిలో చర్చ జరుగుతోంది. ఇంతకీ ఇక్కడ జరుగుతున్నదేంటి..? అదేంటో ఇప్పుడు చూద్దాం..
అత్యాచారం అత్యంత హేయమైన నేరం. నిస్సహాయస్థితిలో ఓ మహిళ మగవారి అక్రుత్యానికి బలవడాన్ని ఏ దేశమూ అంగీకరించదు. అయితే లైంగిక నేరాలను అరికట్టే అత్యాచార చట్టంలో నిబంధనలలో మార్పులు చేస్తూ రూపిందించిన ముసాయిదా బిల్లు స్విట్జర్లాండ్ దిగువ సభలో సోమవారం నాటకీయ పరిణామాల మధ్య ఆమోదం పొందింది.
ప్రస్తుతం ఉన్న చట్టాన్ని విస్తృతం చేయడానికి రూపొందించిన ముసాయిదా బిల్లుకు సభ్యులు ఆమోదం తెలిపారు. స్విట్జర్లాండ్‌లో ప్రస్తుత అత్యాచార చట్టానికి సర్దుబాట్లు అవసరమని కొన్నాళ్లుగా డిమాండ్ వినిపిస్తోంది. ప్రస్తుత చట్టం ప్రకారం మహిళలు ప్రతిఘటించిన ఘటనలను మాత్రమే అత్యాచారంగా పరిగణిస్తున్నారు. అయితే
బాధితురాలు సమ్మతి తెలపకుండా ప్రతిఘటిస్తే? అత్యాచారంగా భావించాలన్న అభిప్రాయంతో దిగువసభ సభ్యులు ఏకీభవించారు.
అయితే మహిళ నుంచి సమ్మతికి కొలమానం ఏంటి?
అనే దానిపై స్విట్జర్లాండ్‌లో తీవ్రమైన చర్చ జరుగుతోంది. కొంతమంది ‘నో మీన్స్ నో’ అనే విధానమే ఉండాలని వాదించారు. దీని ప్రకారం ఒక వ్యక్తి స్పష్టంగా అభ్యంతరం వ్యక్తం చేస్తే అది అత్యాచారంగా పరిగణించాలి. అత్యాచారం చట్టంలో మార్పులకు పార్లమెంటు ఎగువ సభ కౌన్సిల్ ఆఫ్ స్టేట్స్ ఈ ఏడాది ప్రారంభంలోనే అనుకూలంగా ఓటువేసింది.
కానీ దిగువ నేషనల్ కౌన్సిల్ సోమవారం నాటి ఓటింగ్ సందర్భంగా లైంగిక చర్యలకు స్పష్టమైన సమ్మతి అవసరమయ్యే మరింత తీవ్రమైన మార్పులను చేసింది. ‘ఎస్ మీన్స్ ఎస్’ అంటే.. పరస్పర ఆమోదం.. అంగీకారం అన్నట్లే అన్న విధానానికి మొత్తం 190 మంది సభ్యులు ఓటింగులో పాల్గొన్నారు.
ఈ బిల్లుకు 99 మంది అనుకూలంగా, 88 మంది వ్యతిరేకంగా ఓటేసారు. అందులో ముగ్గురు గైర్హాజరయ్యారు. స్వల్ప మెజార్టీతో బిల్లు ఆమోదం పొందింది. ముసాయిదా బిల్లుపై చర్చ సందర్భంగా సోషలిస్ట్ పార్లమెంట్ సభ్యురాలు తమరా ఫునిసిల్లో మాట్లాడుతూ.. ‘‘మీరు అడగకుండా మీ పొరుగువారి పర్సు నుంచి డబ్బులు తీసుకోలేరు.. బెల్ కొట్టకుండా ఒకరి ఇంట్లోకి ప్రవేశించలేరు.
అలాంటప్పుడు నా శరీరం కంటే వాటిని ఎందుకు అంత భద్రంగా చూసుకోవాలి?’ ఆమె ప్రశ్నించారు. గ్రీన్స్ ఎంపీ రాఫెల్ మహిమ్ మాట్లాడుతూ ‘ఇతరుల శరీరం ఎప్పుడూ ఓపెన్ బార్ కాదు’ అని నొక్కి చెప్పారు. అయితే పార్లమెంట్‌లోని చాలా మంది సభ్యులు దీనిని వ్యతిరేకించారు. ఈ వ్యవహారం గందరగోళాన్ని సృష్టిస్తుందని, ఆచరణలో పెట్టడం కష్టమని వాదించారు.
మరోవైపు, అత్యాచార చట్టంలో మార్పులకు స్విట్జర్లాండ్ దిగువ సభ ఆమోదంపై అమ్నెస్టీ ఇంటర్నేషనల్ స్పందించింది. ‘‘మహిళల హక్కుల కోసం, లైంగిక వేధింపుల బాధితుల కోసం సంవత్సరాల తరబడి ఉద్యమకారుల కార్యాచరణ తర్వాత దక్కిన భారీ విజయం’గా ప్రశంసించింది. కానీ ప్రక్రియ ముందుకు సాగడానికి ఉభయసభలు అవగాహనకు రావాలి. అది జరిగిన తర్వాత ఈ అంశంపై ప్రజా ఓటింగ్ కోరుతారు.
స్పెయిన్, స్వీడన్, డెన్మార్క్. బెల్జియంతో సహా అనేక ఇతర యూరోపియన్ దేశాలు అత్యాచారాన్ని స్పష్టమైన అనుమతి లేకుండా లైంగిక చర్యగా నిర్వచించే దిశగా అడుగులు వేస్తున్నాయి. ఏది ఏమైనా ఈ అంశం చాలా హాట్ హాట్ గా డిబేట్ జరిగేలా చేసిందనడంలో సందేహం లేదు.
